t Evengelie volgens Matteüs 10
01Jezus raip zien twaalf leerlingen bie zok, gaf heur macht om kwoaie gaisten oet te drieven en ale zaikte en ale kwoal beter te moaken.
02Dij twaalf haiten zo: nummer ain Simon, doar ze ook wel Petrus tegen zeggen; den zien bruier Andreas en wieder Jakobus, Zebedeüs zien zeun, mit zien bruier Johannes;
03Filippus en Bartolomeüs; Tomas en tolboas Matteüs; Jakobus, Alfeüs zien zeun, en Taddeüs;
04Simon, mit bienoam Vrijhaidsstrieder, en Judas Iskariot, man dij Jezus verroaden het.
05Dizze twaalm werden deur Jezus op pad stuurd mit bosschop: "Kaant van haaidens nait op goan en nait in n stad goan doar Samaritanen wonen.
06Goa laiver noar ofdwoalde schoapen van t hoes Israël tou dij der min aan tou binnen.
07Onderwegens mout ie mensken aanzeggen: 't Keunenkriek van hemel is stoef bie!'
08Moak zaike lu beter, moak doden weer leventeg, meloatse mensken weer geef, drief kwoaie gaisten oet. Omsunt heb ie t kregen, omsunt mout ie t geven.
09Neem gain gold-, zulver- of kopergeld mit in buus,
10 gain pong veur onderwegens, gain twij hemdrokken, gain schounen en gain handstòk. Aarbaider is zien kost ja weerd.
11 En netgliek in wat veur stad of loug ie kommen, kiek den eerst bie wèl of ie t beste touholden kinnen. En blief doar aan joen ofraais tou.
12 Kom ie doar in hoes, geef t groutnis en wèns t vree.
13 As hoes t weerd is den mag joen vree der op deelkommen. Mor aans mag joen vree bie joe weeromkommen.
14 Willen ze joe der nait in loaten en waaigern ze noar joe te lustern, goa den tou dat hoes oet en bie dij stad vandoan en stub joen vouten òf.
15 Ik zeg joe: Sodom en Gomorra zellen der beter ofkommen op dag van t oordail as dij stad! Zekerwoar!
16 Denk ter om: ik stuur joe as schoapen middenmaank wolven. Wees doarom zo verzichteg as slangen en aargeloos as doeven.
17 Woar joe veur mensken! Zai zellen joe aan rechters oetlevern en joe in heur sinagoges mit sweep tamtaaiern.
18 Zai zellen joe veurbrengen veur stadholders en keunenks, om mie. Den zel ie veur heur en veur haaidens om mie getugen mouten.
19 Mor as ze joe oetlevern, mout ie der nait over inzitten hou of wat ie zeggen zellen. Op t aigenste ogenblik zel joe wel ingeven worden wat of ie zeggen mouten.
20 Ie binnen t ja nait dij t zeggen: joen Voader zien Gaist, dij sprekt in joe.
21 Aine bruier zel aander oetlevern en dood insturen. Alderdeegs voaders doun t zulfde mit heur kinder. Kinder zellen zok keren tegen heur olders en heur de dood aan doun.
22 Joa, elkenain zel joe hoaten, om mie. Mor wèl t tou t èn tou oetholdt, dij zel t levent ter òf redden.
23 Zitten ze achter joe heer in d'aine stad, noagel der oet noar d'aander tou. Neem mor van mie aan: Menskenzeun zel kommen veur en aleer ie ale steden in Israël bie langs west hebben.
24 Leerling staait nait boven zien meester of knecht boven zien boas.
25 Leerling mout blied wezen as e zo wied komt as zien meester en knecht zo wied as zien boas. As ze boas van t hoes al oetmoaken veur Beëlzebul, houveulstemeer zellen ze dat zien volk nait doun.
26 Wees doarom mor nait baang veur heur. Der is ja niks ofdekt of t zel bloot kommen en niks achterholden of t zel bekend worden.
27 Aal wat ik joe zeg bie duustern, mout ie bie lichten zeggen. Aal wat of ie joe in t oor flustern heuren, mout ie van doaken òf oetbezunen!
28 Wees nait baang veur heur, dij t liggoam wél ombrengen kinnen, mor zail nait. Wees laiver baang veur hom dij baaident, liggoam en zail, vernailen kin in hel.
29 Dounen muskes nait n stuver de twij? Toch valen ze gainain van baaident omdeel boeten joen Voader om.
30 En hoaren op joen kop binnen alderdeegs altmoal teld.
31 Wees doarom nait baang: ie binnen meer weerd as n haile tjucht muskes.
32 Elkenain dij der tegen mensken over veur oetkomt dat e bie mie heurt, veur dij zel ik oetkommen veur mien Voader dij in hemel is.
33 Mor wèl of mie tegen mensken over nait kennen wil, dij zel ik ook nait kennen willen veur mien Voader in hemel.
34 Haar ie docht dat ik in wereld vree brengen zol? Gain denken aan! Ik breng gain vree, mor t sweerd.
35 Ik bin kommen om n kiel te drieven tussen voader en zeun, tussen moeke en dochter en tussen schoonmoeke en schoondochter.
36 Joa, lu dij sib tou nkander binnen, zellen nkanders vijanden worden.
37 Wèl meer van zien pa of zien moeke holdt as van mie is veur mie niks weerd. Ook wèl zien zeun of zien dochter laiver het, is veur mie niks weerd.
38 Net zo min is veur mie niks weerd dij zien kruus nait op nek nemt en achter mie aan gaait.
39 Wèl aan zien levent vastholdt, zel t verlaizen. Mor wèl of zien levent verlust om mie, dij zel t vinden.
40 Wèl of joe der in let, let mie der in. En wèl of mie der in let, dij let hom der in dij mie stuurd het.
41 Wèl of n profeet der in let omreden t is n profeet, dij zel t loon van n profeet kriegen. Wèl of n rechtveerdege der in let omreden hai is rechtveerdeg, dij zel t loon van n rechtveerdege kriegen.
42 Wèl of aan ain van dizze lutjekes wat geft, ook al is t mor n napke kold wotter, omreden hai is n leerling, zien loon zel e wis nait mislopen. Neem dat mor van mie aan!"
|
